ತಳೂರು ತಂಡಕ್ಕೆ ಪೈಕೇರ ಕಪ್‌

ನಾಲ್ಕನೇ ಬಾರಿ ಪ್ರಶಸ್ತಿ ಗೆಲ್ಲುವ ಪರ್ಲಕೋಟಿ ತಂಡಕ್ಕೆ ನಿರಾಸೆ: 16 ರನ್‌ನಿಂದ ಸೋಲು

  ಪೈಕೇರ್‌ ಕ್ರಿಕೆಟ್‌ ಕಪ್‌ನ ಅಂತಿಮ ಹಣಾಹಣಿಯಲ್ಲಿ ತಳೂರು ತಂಡ ಚೊಚ್ಚಲ ಬಾರಿಗೆ ಪ್ರಶಸ್ತಿ ಮುಡಿಗೇರಿಸಿಕೊಂಡಿದೆ.

  ಕೊಡಗು ಗೌಡ ಯುವ ವೇದಿಕೆ ವತಿಯಿಂದ, ಪೈಕೇರ ಕುಟುಂಬಸ್ಥರ ಆಶ್ರಯದಲ್ಲಿ ನಗರದ ಜನರಲ್‌ ತಿಮ್ಮಯ್ಯ ಜಿಲ್ಲಾ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯಾವಳಿಯ ಫೈನಲ್‌ನಲ್ಲಿ ನಾಲ್ಕನೇ ಬಾರಿಗೆ ಪ್ರಶಸ್ತಿ ಗೆಲ್ಲುವ ಪರ್ಲಕೋಟಿ ತಂಡದ ಆಸೆಯನ್ನು ತಳೂರು ತಂಡ ಭಗ್ನಗೊಳಿ ಚಾಂಪಿಯನ್‌ ಎನಿಸಿಕೊಂಡಿತು.

  ಫೈನಲ್‌ ಪಂದ್ಯಕ್ಕೆ ದಾನಿಗಳಾದ ಕೋಚನ ಪ್ರವೀಣ್‌ ಚೆಂಡನ್ನು ಬಾರಿಸುವ ಮೂಲಕ ಚಾಲನೆ ನೀಡಿದರು. ಟಾಸ್‌ ಗೆದ್ದ ಪರ್ಲಕೋಟಿ ತಂಡ ಬೌಲಿಂಗ್‌ ಆಯ್ಕೆ ಮಾಡಿಕೊಂಡಿತು. ತಳೂರು ತಂಡದ ವಿಕ್ಕಿ ಹಾಗೂ ಜಿತು ಆರಂಭಿಕರಾಗಿ ಕಣಕ್ಕಿಳಿದರು. ಆದರೆ, ಮೊದಲ ಒವರ್‌ನಲ್ಲಿಯೇ ಜಿತು ಶೂನ್ಯಕ್ಕೆ ವಿಕೆಟ್‌ ಒಪ್ಪಿಸಿ ನಿರಾಸೆ ಮೂಡಿಸಿದರು. ಬಳಿಕ 4ನೇ ಓವರ್‌ವರೆಗೂ ರಕ್ಷಣಾತ್ಮಕ ಆಟಕ್ಕೆ ಮೊರೆ ಹೋದ ತಂಡ 5ನೇ ಓವರ್‌ನಲ್ಲಿ ಆಕ್ರಮಣ ಆಟಕ್ಕಿಳಿಯಿತು. ವಿಕ್ಕಿ ಬಿರುಸಿನ ಆಟ ಪ್ರದರ್ಶಿಸುವ ಮೂಲಕ ಪಂದ್ಯದ ಗತಿಯನ್ನೇ ಬದಲಿಸಿದರು. 5ನೇ ಓವರ್‌ನ ಮೊದಲ ಎಸೆತವನ್ನು ಬಾನಂಗಳದಲ್ಲಿ ತೇಲಿಸಿ ಸಿಕ್ಸ್‌ರ್‌ ಬಾರಿಸಿದ ವಿಕ್ಕಿ, ಎರಡನೇ ಎಸೆತದಲ್ಲಿ ಜೀವದಾನ ಪಡೆದು ಎರಡು ರನ್‌ ಗಳಿಸಿದರು. ನಂತರ ಸತತ ಮೂರು ಸಿಕ್ಸರ್‌ ಹಾಗೂ 1 ಬೌಂಡರಿ ಮೂಲಕ 30 ರನ್‌ ಕಲೆ ಹಾಕಿ ಉತ್ತಮ ರನ್‌ ಕಲೆ ಹಾಕುವಲ್ಲಿ ಯಶಸ್ವಿಯಾದರು. ಅಂತಿಮವಾಗಿ 17 ಬಾಲ್‌ನಲ್ಲಿ 42 ರನ್‌ ಚಚ್ಚಿ ಲಕ್ಷಿತ್‌ ಎಸೆತದಲ್ಲಿ ಕ್ಯಾಚ್‌ ನೀಡಿ ನಿರ್ಗಮಿಸಿದರು. ನಂತರ ಬಂದ ಬ್ಯಾಟ್ಸ್‌ಮನ್‌ಗಳು ಬಿರುಸಿನ ಆಟವಾಡಲು ವಿಫಲರಾದರು. ಆದರೆ ಮಧ್ಯಮ ಕ್ರಮಂಕದ ಬ್ಯಾಟ್ಸ್‌ಮನ್‌ ವಿಜು ತಾಳ್ಮೆ ಆಟವಾಡಿ ತಂಡದ ಮೊತ್ತ ಹೆಚ್ಚಿಸುವಲ್ಲಿ ಸಫಲರಾದರು. ಮನೋಜ್‌ 1, ಅಣ್ಣಯ್ಯ 2, ಪ್ರಸಾದ್‌ 1, ಪವನ್‌ 4, ಗಗನ್‌ 2 ರನ್‌ ಗಳಿಸಿದರು. ನಿಗದಿತ 10 ಓವರ್‌ಗೆ 7 ವಿಕೆಟ್‌ ನಷ್ಟಕ್ಕೆ 89 ರನ್‌ ಕಲೆಹಾಕಿತು.

  ಗೆಲುವಿಗಾಗಿ 90 ರನ್‌ಗಳ ಸವಾಲಿನ ಮೊತ್ತವನ್ನು ಬೆನ್ನತ್ತಿದ ಪರ್ಲಕೋಟಿ ತಂಡ 16 ರನ್‌ಗಳಿಂದ ಸೋಲೊಪ್ಪಿಕೊಂಡಿತು. ಸಜನ್‌ ಹಾಗೂ ದರ್ಶನ್‌ರ ಬಿರುಸಿನ ಬ್ಯಾಟಿಂಗ್‌ನಿಂದ ಉತ್ತಮ ಆರಂಭ ಪಡೆಯಿತಾದರೂ (ಸಜನ್‌ 17, ದರ್ಶನ್‌ 11) ಗೆಲ್ಲುವ ಕನಸು ನನಸಾಗಲಿಲ್ಲ. ಸನತ್‌ 14 ಗಳಿಸಿ ಔಟಾದರೆ, ಬಳಿಕ ಬಂದ ಬ್ಯಾಟ್ಸ್‌ಮನ್‌ಗಳು ಎರಡಂಕಿಯನ್ನೂ ದಾಟಲಿಲ್ಲ. ಸತ್ಯ 8, ರಜಿತ್‌ 1, ದಿಜಿತ್‌ 7, ಕೀರ್ತನ್‌ 0, ದಯಾ 6 ರನ್‌ಗಳಿಸಿದರು. ಅಂತಿಮವಾಗಿ ಪರ್ಲಕೋಟಿ ತಂಡ 16 ರನ್‌ಗಳಿಂದ ಪರಾಭವಗೊಂಡಿತು.

ಕುಣಿದು ಕುಪ್ಪಳಿಸಿದರು...

  ಫೈನಲ್‌ ಪಂದ್ಯಾವಳಿಗೆಂದು ಕಾರ್ಯಕ್ರಮ ಆಯೋಜಕರು ವಿಶೇಷ ಬ್ಯಾಂಡ್‌ ವ್ಯವಸ್ಥೆ ಮಾಡಿದ್ದರು. ಬ್ಯಾಟ್ಸ್‌ಮನ್‌ಗಳು ಬೌಂಡರಿ, ಸಿಕ್ಸರ್‌ ಬಾರಿಸುತ್ತಿದ್ದಂತೆ ಬ್ಯಾಂಡ್‌ ಬಾರಿಸಿ ಕ್ರೀಡಾಭಿಮಾನಿಗಳ ಹರುಷವನ್ನು ದುಪ್ಪಟ್ಟು ಮಾಡುತ್ತಿದ್ದರು. ತಳೂರು ತಂಡ ಜಯ ಸಾಧಿಸಿದೊಡನೆ ತಂಡದ ಕುಟುಂಬಸ್ಥರು ಹಾಗೂ ಆಟಗಾರರು ಮೈದಾನ ಪ್ರವೇಶಿಸಿ ಕುಣಿದಾಡಿದರು. ಮಹಿಳೆಯರು ಮಕ್ಕಳು ಸೇರಿದಂತೆ ಕುಟುಂಬ ವರ್ಗದವರೆಲ್ಲ ಹೆಜ್ಜೆ ಹಾಕಿ ಸಂಭ್ರಮಿಸಿದರು.

ಮೂರನೇ ಸ್ಥಾನ-ದಂಬೆಕೋಡಿ ಹಾಗೂ ಊಳುವಾರನ

ಪಂದ್ಯಶ್ರೇಷ್ಠ-ಪರ್ಲಕೋಟಿ ಸಜನ್‌

ಉತ್ತಮ ಬೌಲರ್‌-ಊಳುವಾರನ ಮೋಕ್ಷಿತ್‌

ಉತ್ತಮ ಬ್ಯಾಟ್ಸ್‌ಮನ್‌ -ತಳೂರು ವಿಕ್ಕಿ

ಉತ್ತಮ ಆಲ್‌ ರೌಂಡರ್‌-ತಳೂರು ಜೀತು

ಪಂದ್ಯಾವಳಿಯಲ್ಲಿ ಹೆಚ್ಚು ಸಿಕ್ಸರ್‌ ಗಳಿಸಿದವರು-ಪೈಕೇರ ಗಗನ್‌

ಫೈರ್‌ ಪ್ಲೇ ಟೀಮ್‌-ದಂಬೆಕೋಡಿ

ಕಬ್ಬಡಿ (ಪುರುಷರು) -ಕೊಳಂಬೆ (ಪ್ರ)

ಪೀಚೆಮನೆ (ದ್ವಿ)

ಕಬ್ಬಡಿ ಮಹಿಳೆಯರು-ಹೊಸೋಕ್ಲು (ಪ್ರ)

ಕೂರ್ಗ್‌ ಕ್ವಿನ್ಸ್‌ (ದ್ವಿ)

ಥ್ರೋ ಬಾಲ್‌ (ಮಹಿಳೆಯರು)

ಕಟ್ಟೆಮನೆ (ಪ್ರ)

ಬೈನೆರವನ(ದ್ವಿ)

ಗಮನ ಸೆಳೆದ ಸಾಂಸ್ಕೃತಿಕ ಕಾರ್ಯಕ್ರಮ

  ಸಾಂಸ್ಕೃತಿಕ ಕಾರ್ಯಕ್ರಮವನ್ನು ಕರ್ನಾಟಕ ಅರೆಭಾಷೆ ಸಂಸ್ಕೃತಿ ಮತ್ತು ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ಕೊಲ್ಯದ ಗಿರೀಶ್‌ ಉದ್ಘಾಟಿಸಿದರು. ಅರೆಭಾಷೆ ಸಾಹಿತ್ಯ ಅಕಾಡೆಮಿ ವತಿಯಿಂದ ನಡೆದ ನಾನಾ ಸಾಂಸ್ಕೃತಿಕ ಕಾರ್ಯಕ್ರಮಗಳು ನೋಡುಗರ ಮನ ಸೆಳೆಯಿತು. ಚೊಕ್ಕಾಡಿ ಪ್ರೇಮ ಮತ್ತು ತಂಡದಿಂದ ನಡೆದ ಸಾಂಸ್ಕೃತಿಕ ನೃತ್ಯ, ಕೂಡಕಂಡಿ ತರುಣ್‌ ಹಾಗೂ ತಂಡದಿಂದ ನಡೆದ ಸಾಂಸ್ಕೃತಿಕ ಉಡುಪು ಪ್ರದರ್ಶನ, ಕೊಡಗು ಗೌಡ ಯುವ ವೇದಿಕೆ ವತಿಯಿಂದ ನಡೆದ ಬೆಳಕಾಟ್‌, ಕುಕ್ಕೆರ ಲಕ್ಷ ್ಮಣ ಮಾರ್ಗದರ್ಶನದಲ್ಲಿ ಮೂಡಿಬಂದ ವೀರ ಚರಿತ್ರೆ, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಪ್ರಾಯೋಜಕತ್ವದಲ್ಲಿ ಹಾಸ್ಯ ಕಲಾವಿದ ರಾಘವೇಂದ್ರ ಮತ್ತು ತಂಡದಿಂದ ಹಾಸ್ಯ ಲಹರಿ ಹಾಗೂ ರಸಮಂಜರಿ ಕಾರ್ಯಕ್ರಮ ಪ್ರೇಕ್ಷ ಕರಿಂದ ಚಪ್ಪಾಳೆ ಗಿಟ್ಟಿಸುವಲ್ಲಿ ಯಶಸ್ವಿಯಾಯಿತು. ರಾಯಲ್‌ ಬ್ರದರ್ಸ್‌ ಸಂಸ್ಥೆಯ ಪ್ರಾಯೋಜಕತ್ವದಲ್ಲಿಮೈಸೂರಿನ ಸಾವನ್‌ ತಂಡದಿಂದ ರಾಕ್‌ ಮ್ಯೂಸಿಕ್‌ ಕಾರ್ಯಕ್ರಮ ಪ್ರೇಕ್ಷ ಕರಿಂದ ಚಪ್ಪಾಳೆ ಗಿಟ್ಟಿಸಿತು.

ಸನ್ಮಾನ

  ಕಾರ್ಯಕ್ರಮದಲ್ಲಿ ಶಿಕ್ಷ ಣ ಇಲಾಖೆಯ ನಿವೃತ್ತ ಜಂಟಿ ನಿರ್ದೇಶಕ ಕೊಂಪುಳಿರ ಆನಂದ್‌, ಶಿಕ್ಷ ಣ ಕ್ಷೇತ್ರದ ಸಾಧನೆಗಾಗಿ ದೇವಜನ ಮೋಹನ್‌, ಸಾಹಿತ್ಯ ಕ್ಷೇತ್ರದಲ್ಲಿ ಕಟ್ರತನ ಬೆಳ್ಯಪ್ಪ ಮತ್ತು ಪಟ್ಟಡ ಪ್ರಭಾಕರ್‌, ಕ್ರೀಡಾಕ್ಷೇತ್ರದಲ್ಲಿ ಚೆರಿಯಮನೆ ಮೇಘ ಪ್ರಭಾಕರ್‌, ಕುಯ್ಮುಡಿ ಹನಿ, ಚೋಂಡಿರ ತವನ್‌, ಮೇರ್ಕಜೆ ಗಿರೀಶ್‌, ರಾಜ್ಯ ಮಟ್ಟದ ಕರಾಟೆ ಪಟು ಬೈಲೇರ ಪ್ರೊನಿಕ್ಷ , ಸಹಕಾರಿ ಕ್ಷೇತ್ರ ಕಾಂಗೀರ ಸತೀಶ್‌, ಲಾಂಛನ ವಿನ್ಯಾಸ ಪುದಿಯನೆರವನ ರಿಶಿತ್‌ ಮಾದಯ್ಯ ಹಾಗೂ ಕರ್ಣಯ್ಯನ ಅನೂಪ್‌ ಕಾರ್ಯಪ್ಪರವರನ್ನು ಸನ್ಮಾನಿಸಲಾಯಿತು.

ಐನ್‌ಮನೆ ವೇದಿಕೆ

  ಪೈಕೇರ ಕಪ್‌ನ ಸಭಾ ಕಾರ್ಯಕ್ರಮದ ಅಂಗವಾಗಿ ವೇದಿಕೆಯಲ್ಲಿ ಪೈಕೇರ ಕುಟುಂಬಸ್ಥರ ಐನ್‌ಮನೆ ರೀತಿಯ ವೇದಿಕೆ ಸಿದ್ಧಪಡಿಸಿದ್ದು ವಿಶೇಷವಾಗಿತ್ತು. ಆಧುನಿಕ ಯುಗದಲ್ಲಿ ಐನ್‌ಮನೆ ಎಂಬ ಪರಿಕಲ್ಪನೆ ದೂರವಾಗುತ್ತಿದ್ದು, ಮೂಲೆ ಗುಂಪಾಗಿರುವ ಐನ್‌ಮನೆಯನ್ನು ಉಳಿಸಿ ಬೆಳೆಸುವ ಉದ್ದೇಶದಿಂದ ಐನ್‌ ಮನೆ ರೀತಿಯ ವೇದಿಕೆಯನ್ನು ಸಿದ್ಧಪಡಿಸಲಾಗಿದ್ದು ಕ್ರೀಡಾಭಿಮಾನಿಗಳ ಮನಸೂರೆಗೊಂಡಿತು.

Other News

Family Insights Campaign!

Family page has been upgraded by few new features. We kindly request you all to send relevant information about your family to our email id contact@kdkgowdas.com or whatsapp it to 8971239792. Please visit to Kumbalacheri, kuntukadu, Kudekallu family as a refference.

Informations required:

  1. Ainmane/Taravadu image.
  2. Family info like alternative names, age etc.
  3. Family description: a brief note about family
  4. Bali/Gothra
  5. Family population
  6. Kutumbada yajamana's name
  7. Ainmane/Tharavadu Location
  8. Ainmane/Tharavadu Address
  9. Rituals and programs held at Ainmane/Tharavadu
  10. Stories : if any achievements or major contribution to the society
  11. Info collectors name
  12. Relevant photos if any

Please support this campaign and make it successful

ಕೊಡಗು ಗೌಡ ವಿದ್ಯಾ ಸಂಘ ಪ್ರತಿಭಾ ಪುರಸ್ಕಾರ

ಕೊಡಗು ಗೌಡ ವಿದ್ಯಾಸಂಘದ ವತಿಯಿಂದ ಪ್ರತಿ ವರ್ಷದಂತೆ ಈ ಬಾರಿಯು ಎಸ್.ಎಸ್.ಎಲ್.ಸಿ ಯಲ್ಲಿ ಗ್ರಾಮೀಣ 85% ಮೇಲ್ಪಟ್ಟು ಅಂಕ ಪಡೆದ ವಿದ್ಯಾರ್ಥಿಗಳಿಗೆ ಹಾಗು ನಗರದ 90% ಮೇಲ್ಪಟ್ಟು ಅಂಕ ಪಡೆದ ವಿದ್ಯಾರ್ಥಿಗಳಿಗೆ, ಪಿ.ಯು.ಸಿ ಮತ್ತು ಪದವಿ ತರಗತಿಯಲ್ಲಿ ಅತಿ ಹೆಚ್ಚು ಅಂಕ ಪಡೆದು ಉತ್ತೀರ್ಣರಾಗಿರುವ ಮತ್ತು ಸಿ.ಇ.ಟಿ ಮತ್ತು ಎನ್.ಇ.ಇ.ಟಿ ಯಲ್ಲಿ 1000 ರಾಂಕ್ ಒಳಗೆ ಪಡೆದುಕೊಂಡಿರುವ ಗೌಡ ಜನಾಂಗದ ಪ್ರತಿಭಾವಂತ ವಿದ್ಯಾರ್ಥಿಗಳಿಗೆ ಪ್ರತಿಭಾ ವೇತನ ನೀಡಲಾಗುವುದು. ವಿವರಗಳಿಗೆ ಕೆಳಗಿನ ನೋಟೀಸ್ ನೋಡಿ..

ಅರೆಭಾಷೆ ಮುಡ್ಪು ಕಥಾ ಸ್ಪರ್ಧೆ

Carrom & Chess Tournament - 2018

ಹಿಮಗಡ್ಡೆಯ ಮೇಲೆ ಕೊಡಗಿನ ಹುಡುಗಿಯ ಹೆಜ್ಜೆ ಗುರುತು : ಧೀರೆ ಭವಾನಿಯಿಂದ ಪರ್ವತಾರೋಹಣ

  ಹಿಮಗಡ್ಡೆಯ ಮೇಲೆ ಹೆಜ್ಜೆಯಿಟ್ಟು, ಕಠಿಣ ಪರಿಸ್ಥಿತಿಯಲ್ಲಿಯೂ ಎದೆಗುಂದದೆ ಗುರಿಮುಟ್ಟಿ ಬಂದ ಯುವತಿ ಎಂಬ ಖ್ಯಾತಿಗೆ ಕೊಡಗಿನ ಹುಡುಗಿ ಟಿ.ಎನ್.ಭವಾನಿ ಭಾಜನರಾಗಿದ್ದಾರೆ.
  ಹಾಗೆ ನೋಡಿದರೆ ಸೈನ್ಯ ಸೇರಿದಂತೆ ಹಲವು ರಕ್ಷಣಾ ಪಡೆಗಳಲ್ಲಿ ಕೊಡಗಿನ ಯುವತಿಯರು ಕಾರ್ಯ ನಿರ್ವಹಿಸುತ್ತಿದ್ದಾರೆ. ಜತೆಯಲ್ಲೇ ಕ್ರೀಡೆ ಸೇರಿದಂತೆ ಸಾಹಸ ಕ್ಷೇತ್ರಗಳಲ್ಲೂ ಹಿಂದೆ ಬಿದ್ದಿಲ್ಲ. ಇಂತಹ ಯುವತಿಯರ ಸ್ಪೂರ್ತಿಯನ್ನೇ ಮುಂದಿಟ್ಟುಕೊಂಡು ಪರ್ವತಾರೋಹಣದಂತಹ ಕ್ಷೇತ್ರದಲ್ಲಿ ಸಾಧನೆ ಮಾಡಬೇಕೆಂದು ಪಣ ತೊಟ್ಟಿರುವ ಭವಾನಿ ಆ ನಿಟ್ಟಿನಲ್ಲಿ ಶ್ರಮವಹಿಸುತ್ತಿದ್ದಾರೆ.
  ಕೊಡಗಿನ ನಾಪೋಕ್ಲು ಸಮೀಪದ ಪೆರೂರು ಗ್ರಾಮದ ತೆಕ್ಕಡ ನಂಜುಂಡ(ಶಂಭು) ಮತ್ತು ಪಾರ್ವತಿ(ದಿವ್ಯ) ದಂಪತಿ ಪುತ್ರಿಯಾಗಿರುವ ಭವಾನಿ ತನ್ನ ಪ್ರಾಥಮಿಕ ವಿದ್ಯಾಭ್ಯಾಸವನ್ನು ಶ್ರೀಮಂಗಲದ ಜೆಸಿ ಶಾಲೆಯಲ್ಲಿ, ಬಳಿಕ ಗಾಳಿಬೀಡುವಿನ ಜವಾಹರ ನವೋದಯ ವಿದ್ಯಾಲಯದಲ್ಲಿ ವಿದ್ಯಾಭ್ಯಾಸ ಮುಗಿಸಿ ಮಂಗಳೂರಿನ ಸೆಂಟ್ ಅಗ್ನೇಸ್ ಕಾಲೇಜಿನಲ್ಲಿ ಪದವಿ ಮುಗಿಸಿ ಇದೀಗ ಡಾರ್ಜಲಿಂಗ್‌ನ ಹಿಮಾಲಯ ಮೌಂಟೇನಿಯರಿಂಗ್ ಇನ್ಸಿಟ್ಯೂಟ್‌ನಲ್ಲಿ ಬೋಧಕರಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ.
ಪ್ರೌಢಶಾಲೆಯಿಂದಲೇ ಎನ್‌ಸಿಸಿ ಸೇರಿ ಕಾಲೇಜಿನಲ್ಲೂ ಮುಂದುವರೆಸಿ ವಿವಿಧ ಕ್ಯಾಂಪ್‌ಗಳಲ್ಲಿ ಭಾಗವಹಿಸಿ ತರಬೆತಿ ಪಡೆದು ೨೦೧೬ರಲ್ಲಿ ನವದೆಹಲಿಯ ರಾಜಪಥ್‌ನಲ್ಲಿ ನಡೆದ ಗಣರಾಜ್ಯೋತ್ಸವದ ಪೆರೇಡ್‌ನಲ್ಲಿ ಭಾಗವಹಿಸಿ ಗಮನಸೆಳೆದಿದ್ದಾರೆ.


  ಜೋದ್‌ಫುರ್‌ನಲ್ಲಿ ನಡೆದ ವಾಯುದಳದ ಅಖಿಲ ಭಾರತ ವಾಯು ಸೈನಿಕ್ ಶಿಬಿರದಲ್ಲೂ ಪಾಲ್ಗೊಂಡು ಮುಖ್ಯಮಂತ್ರಿ ಸಿದ್ದರಾಮಯ್ಯ, ಎನ್‌ಸಿಸಿಯ ಡೈರೆಕ್ಟರ್ ಜನರಲ್ ಲೆ.ಜ. ಅನಿರುದ್ಧ ಚಕ್ರವರ್ತಿ, ಕರ್ನಾಟಕ, ಗೋವಾ ಎನ್‌ಸಿಸಿ ಡೆಪ್ಯೂಟಿ ಡೈರೆಕ್ಟರ್ ಜನರಲ್ ಏರ್ ಕಮಾಂಡರ್ ಸಿ.ರಾಜೀವ್ ಅವರಿಂದ ಶ್ಲಾಘನೆಗೆ ಪಾತ್ರರಾಗಿದ್ದಾರೆ.
ಪರ್ವಾತಾರೋಹಣದಲ್ಲಿ ಹೆಚ್ಚಿನ ಆಸಕ್ತಿ ಹೊಂದಿರುವ ಭವಾನಿ ಅವರು, ಪ್ರಾಥಮಿಕ ತರಬೇತಿಯನ್ನು ಮನಾಲಿಯ ಅಟಲ್ ಬಿಹಾರಿ ವಾಜಪೇಯಿ ಇನ್ಸ್‌ಟ್ಯೂಟ್ ಆಫ್ ಮೌಂಟೇನರಿಂಗ್ ಆಲೈಡ್ ಸ್ಪೋರ್ಟ್ಸ್(ಎಬಿವಿಐಎಂಎಎಸ್) ಪಡೆದಿದ್ದಾರೆ. ಆ ನಂತರ ಹೆಚ್ಚಿನ ತರಬೇತಿಯನ್ನು ಡಾರ್ಜಲಿಂಗ್‌ನ ಹಿಮಾಲಯ ಮೌಂಟೇನಿಯರಿಂಗ್ ಇನ್ಸಿಟ್ಯೂಟ್(ಹೆಚ್‌ಎಂಐ) ಪಡೆದಿದ್ದಾರೆ.
  ಹಿಮಾಲಯ ಮೌಂಟೇನಿಯರಿಂಗ್ ಇನ್ಸಿಟ್ಯೂಟ್‌ನಿಂದ ಈಗಾಗಲೇ ಹಿಮಾಲಯ ಪರ್ವತ ಸೇರಿದಂತೆ ಹಲವು ಕಠಿಣ ಪರ್ವತಗಳಲ್ಲಿ ಪರ್ವತಾರೋಹಣ ನಡೆಸಿದ್ದು, ಈ ಪೈಕಿ ಅತ್ಯಂತ ಕಠಿಣವಾಗಿರುವ ಪ್ರಥಮ ದರ್ಜೆಯ ತರಬೇತಿಯನ್ನು ಯಶಸ್ವಿಯಾಗಿ ಮುಗಿಸುವ ಮೂಲಕ ಇಂತಹ ತರಬೇತಿಯನ್ನು ಪೂರೈಸಿದ ಏಕೈಕ ಯುವತಿ ಎಂಬ ಖ್ಯಾತಿಯನ್ನು ಪಡೆದುಕೊಂಡಿದ್ದಾರೆ. ಈಗಾಗಲೇ ಉತ್ತರಾಖಾಂಡ್‌ನ ರುಡುಗೈರ್, ಮನಾಲಿಯ ಫ್ರೆಂಡ್‌ಶಿಪ್, ಸಿಕ್ಕಿಮ್‌ನ ರೆನಾಕ್, ಲೇಹ್‌ನ ಸ್ಟಾಕ್ ಕಂಗ್ರಿಯಲ್ಲಿ ಮಂಜುಗಡ್ಡೆಯ ಪರ್ವತಗಳನ್ನೇರಿ ಯಶಸ್ಸು ಸಾಧಿಸಿರುವ ಇವರು ಭವಿಷ್ಯದಲ್ಲಿ ಗೌರಿಶಂಕರ ಶಿಖರವನ್ನೇರುವ ಕನಸು ಹೊಂದಿದ್ದಾರೆ.
ಈಜು, ಕುದುರೆ ಸವಾರಿ, ರಕ್ಷಣಾ ಕ್ಷೇತ್ರಕ್ಕೆ ಸಂಬಂಧಿಸಿದ ಹಲವು ತರಬೇತಿಗಳನ್ನು ಮುಗಿಸಿದ್ದು, ಸೈನ್ಯದಲ್ಲಿ ಕೆಲಸ ಮಾಡುವ ಬಯಕೆಯನ್ನು ಹೊಂದಿದ್ದಾರೆ. ಈಗಾಗಲೇ ಕೊಡಗಿನಲ್ಲಿ ಹಲವು ಯುವತಿಯರು ರಕ್ಷಣಾ ಪಡೆಯಲ್ಲಿ ವಿವಿಧ ಹುದ್ದೆಗಳಲ್ಲಿ ಕಾರ್ಯನಿರ್ವಹಿಸುತ್ತಾ ದೇಶ ಸೇವೆಯಲ್ಲಿ ತೊಡಗಿರುವುದನ್ನು ನಾವು ಕಾಣಬಹುದು. ಹೀಗಿರುವಾಗ ತಾನು ಕೂಡ ಸೈನ್ಯಕ್ಕೆ ಸೇರಿ ದೇಶ ಸೇವೆ ಮಾಡಬೇಕೆನ್ನುವುದು ಭವಾನಿಯ ಬಯಕೆಯಾಗಿದೆ.