Youth Mela - YuvaTaranga - 2017

YuvaTaranga - Kodagu & Dakshina Kannada Gowda Samaja Bangalore - 29th Oct 2017

 

Other News

ನಾಳೆಯಿಂದ ಪೈಕೆರ ಕಪ್‌ ಕ್ರಿಕೆಟ್‌ ಜಂಬರ

210 ತಂಡಗಳಿಂದ ಸೆಣಸಾಟ: ಮೇ 7 ರಂದು ಫೈನಲ್ಸ್‌

ಹಲವು ವಿಶೇಷತೆಗಳೊಂದಿಗೆ ಕೊಡಗು ಗೌಡ ಕುಟುಂಬಗಳ ನಡುವಿನ ಕ್ರಿಕೆಟ್‌ ಪಂದ್ಯಾವಳಿ ''ಪೈಕೇರ ಕಪ್‌-2017'' ಏ.21ರಂದು ಆರಂಭವಾಗಲಿದ್ದು, 210 ತಂಡಗಳು ಸ್ಪರ್ಧಿಸಲಿವೆ.

ಕಳೆದ ವರ್ಷ ನಡೆದ ಕುಟ್ಟನ ಕಪ್‌ನಲ್ಲಿ 180 ತಂಡಗಳು ಭಾಗವಹಿಸಿದ್ದವು. ಈ ಬಾರಿ ಪೈಕೆರ ಕಪ್‌ ಈ ದಾಖಲೆಯನ್ನು ಮುರಿದಿದೆ. ನಗರದ ಜನರಲ್‌ ತಿಮ್ಮಯ್ಯ ಕ್ರೀಡಾಂಗಣದಲ್ಲಿ ಪಂದ್ಯಾವಳಿ ನಡೆಯಲಿದ್ದು, ಈ ಕ್ರೀಡಾಂಗಣದಲ್ಲಿ 2 ಮೈದಾನ ಸಿದ್ಧಪಡಿಸಲಾಗುತ್ತಿದೆ. ಬುಧವಾರ ಬೆಳಗ್ಗೆ ಈ ಕಾರ್ಯಕ್ಕೆ ಭೂಮಿ ಪೂಜೆ ನೆರವೇರಿಸಲಾಯಿತು.

ಕೊಡಗು ಗೌಡ ಯುವ ವೇದಿಕೆಯ ಆಶ್ರಯದಲ್ಲಿ ಕೊಡಗು ಗೌಡ ಕುಟುಂಬಗಳ ನಡುವೆ ಕ್ರಿಕೆಟ್‌ ಪಂದ್ಯ ನಡೆಯಲಿದೆ. ಈ ಬಾರಿ ಹಲವು ವಿಶೇಷತೆಗಳನ್ನು ಪಂದ್ಯಾವಳಿ ಒಳಗೊಂಡಿದ್ದು, ಪೈಕೇರ ಕುಟುಂಬದವರು ಯುವ ವೇದಿಕೆಯ ಪದಾಧಿಕಾರಿಗಳೊಂದಿಗೆ ಪಂದ್ಯಾವಳಿ ಯಶಸ್ವಿಗೆ ಶ್ರಮಿಸುತ್ತಿದ್ದಾರೆ.

ಏ.21ರಂದು ಬೆಳಗ್ಗೆ ನಗರದ ಓಂಕಾರೇಶ್ವರ ದೇವಸ್ಥಾನದಲ್ಲಿ ಕ್ರೀಡಾ ಜ್ಯೋತಿ ಬೆಳಗಿ, ನಂತರ ಗುಡ್ಡಮನೆ ಅಪ್ಪಯ್ಯ ಪ್ರತಿಮೆಯಿಂದ ನಗರದ ಜಿಲ್ಲಾ ಕ್ರೀಡಾಂಗಣದವರೆಗೆ ಕೊಂಡೊಯ್ಯಲಾಗುವುದು. ಈ ಸಂದರ್ಭ ರಾಷ್ಟ್ರೀಯ, ಅಂತಾಷ್ಟ್ರೀಯ ಹಾಗೂ ರಾಜ್ಯಮಟ್ಟದಲ್ಲಿ ಸಾಧನೆ ಮಾಡಿರುವ ಗೌಡ ಜನಾಂಗದ ಕ್ರೀಡಾಪಟುಗಳು ಭಾಗವಹಿಸಲಿದ್ದಾರೆ.

ಏ. 21ರಿಂದಲೇ ಎರಡೂ ಮೈದಾನಗಳಲ್ಲಿ ಪಂದ್ಯಾವಳಿ ಆರಂಭವಾಗಲಿದೆ. ಒಟ್ಟು ನಾಲ್ಕು ಸುತ್ತಿನಲ್ಲಿ ಪಂದ್ಯ ನಡೆಯಲಿದೆ. ಮೇ 5ರಂದು ಫ್ರೀ ಕ್ವಾರ್ಟರ್‌ ಪಂದ್ಯ ಹಾಗೂ 2 ಕ್ವಾರ್ಟರ್‌ ಪಂದ್ಯ ನಡೆಯಲಿದೆ. ಮೇ 6 ರಂದು 2 ಕ್ವಾರ್ಟರ್‌ ಫೈನಲ್ಸ್‌ ಹಾಗೂ ಸೆಮಿಫೈನಲ್ಸ್‌ ನಡೆಯಲಿದೆ. ಮೇ 7ರಂದು ಬೆಳಗ್ಗೆ 10.30ಕ್ಕೆ ಅಂತಿಮ ಹಣಾಹಣಿ ನಡೆಯಲಿದೆ. ಬಳಿಕ ಸಮಾರೋಪ ಕಾರ್ಯಕ್ರಮ, ಬಹುಮಾನ ವಿತರಣೆ, ಸಾಂಸ್ಕೃತಿಕ ಕಾರ್ಯಕ್ರಮ ನೆರವೇರಲಿದೆ. ಕ್ರಿಕೆಟ್‌ ಪಂದ್ಯಾವಳಿಗೆ ಸುಮಾರು 74 ಲಕ್ಷ ರೂ. ವೆಚ್ಚವಾಗುವ ಅಂದಾಜು ಮಾಡಲಾಗಿದೆ.

ಪೈಕೆರ ಕುಟುಂಬ ರೆಡಿ: ಕೊಡಗು ಗೌಡ ಯುವ ವೇದಿಕೆ ಪ್ರತಿವರ್ಷ ಯಾವುದಾದರೊಂದು ಕುಟುಂಬದ ಸಹಯೋಗದಲ್ಲಿ ಕ್ರಿಕೆಟ್‌ ಪಂದ್ಯಾಟ ನಡೆಸುತ್ತದೆ. ಈ ಬಾರಿ ಮಡಿಕೇರಿ ತಾಲೂಕು ಬಿಳಿಗೇರಿಯ ಮೂಲವನ್ನು ಹೊಂದಿರುವ ಪೈಕೆರ ಕುಟುಂಬ ಕೈಜೋಡಿಸಿದೆ. ಪೈಕರೆ ಕುಟುಂಬದಲ್ಲಿ ಸುಮಾರು 16 ಮನೆಗಳಿದ್ದು, 68 ರಿಂದ 70 ಸದಸ್ಯರಿದ್ದಾರೆ. ಈ ಕುಟುಂಬದ ಸದಸ್ಯರು ಪಾಲಿಬೆಟ್ಟ ಹಾಗೂ ಗೋಣಿಕೊಪ್ಪಲು ಸೇರಿದಂತೆ ಕೊಡಗಿನ ಹಲವು ಭಾಗಗಳಲ್ಲಿ ನೆಲೆಸಿದ್ದಾರೆ.

ಲಿಂಗರಾಜೇಂದ್ರ ಒಡೆಯನ ಕಾಲದಲ್ಲಿ ಅಂದರೆ ಸುಮಾರು 1,815ರಲ್ಲಿ ಪೈಕೆರ ಕುಟುಂಬದ ಮೂಲ ಪುರುಷ ಕರಿಯಣ್ಣ ಗೌಡ ಜಿಲ್ಲೆಗೆ ಆಗಮಿಸಿ ಬಿಳಿಗೇರಿಯಲ್ಲಿ ನೆಲೆಸಿದರು. ಬಳಿಕ ಮುದ್ದಯ್ಯ, ಜೋಯಪ್ಪ, ಬೆಳ್ಳಿಯಪ್ಪ ಹಾಗೂ ಕುಶಾಲಪ್ಪ ಅವರ ಮೂಲಕ ಈ ವಂಶ ಬೆಳೆಯಿತು. ಈ ಕುಟುಂಬದಲ್ಲಿ ನಾನಾ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿದವರಿದ್ದಾರೆ. ನಂಜುಂಡ ಅವರು ಈ ಕುಟುಂಬದ ಪಟ್ಟೆದಾರರಾಗಿದ್ದಾರೆ.

ಗಮನ ಸೆಳೆಯಲಿರುವ ಕಬಡ್ಡಿ: ಕ್ರಿಕೆಟ್‌ ಪಂದ್ಯಾವಳಿ ಸಂದರ್ಭ ಕಬಡ್ಡಿ ಪಂದ್ಯ ವಿಶೇಷ ಆಕರ್ಷಣೆಯಾಗಿದೆ. ಕಳೆದ ವರ್ಷ ಪುರುಷರ ಕಬಡ್ಡಿ ಆರಂಭವಾದರೆ, ಈ ಬಾರಿ ಮಹಿಳಾ ತಂಡಗಳ ನಡುವೆಯೂ ಕಬಡ್ಡಿ ಏರ್ಪಡಿಸಲಾಗಿದೆ. 8 ತಂಡಗಳು ಸೆಣಸಲಿವೆ. ಪುರುಷರ ವಿಭಾಗದಲ್ಲಿ 32 ಕುಟುಂಬ ತಂಡಗಳು ಪೈಪೋಟಿ ನಡೆಸಲಿವೆ.

ಕೊಡಗು ಗೌಡ ಯುವ ವೇದಿಕೆ ಕಳೆದ ಹಲವು ವರ್ಷಗಳಿಂದ ಗೌಡ ಕುಟುಂಬಗಳ ನಡುವೆ ಕ್ರಿಕೆಟ್‌ ಪಂದ್ಯಾವಳಿ ಏರ್ಪಡಿಸುತ್ತಿದೆ. ಈ ಬಾರಿ ಪೈಕೆರ ಕಪ್‌ನಲ್ಲಿ ಹಲವು ವಿಶೇಷತೆಗಳಿರುತ್ತವೆ. ಎಲ್ಲರ ಸಹಕಾರವನ್ನು ನಿರೀಕ್ಷಿಸುತ್ತಿದ್ದೇವೆ.

-ಪೈಕೇರ ಮನಹೋರ್‌ ಮಾದಪ್ಪ, ಕೊಡಗು ಗೌಡ ಯುವ ವೇದಿಕೆ ಅಧ್ಯಕ್ಷರು

ಜನರಲ್‌ ತಿಮ್ಮಯ್ಯ ಕ್ರೀಡಾಂಗಣದಲ್ಲಿ ಭೂಮಿ ಪೂಜೆ ಬಳಿಕ ಮೈದಾನ ಸಿದ್ಧಪಡಿಸಲಾಗುತ್ತಿದೆ. ಎರಡು ಮೈದಾನದಲ್ಲಿ ಪಂದ್ಯಾವಳಿ ನಡೆಯಲಿದ್ದು, ಬಹುತೇಕ ಎಲ್ಲಾ ತಯಾರಿ ಮುಗಿದಿದೆ. ಒಟ್ಟು 210 ತಂಡಗಳು ಸೆಣಸಲಿವೆ.

-ಕುಡೆಕಲ್‌ ಸಂತೋಷ್‌, ಪ್ರಚಾರ ಸಮಿತಿ ಅಧ್ಯಕ್ಷರು

ಸ್ನೇಹ ಮಿಲನ, ಪ್ರತಿಭಾ ಪುರಸ್ಕಾರ ಹಾಗು ನೂತನ ಆಡಳಿತ ಮಂಡಳಿ ಪದಗ್ರಹಣ ಸಮಾರಂಭ

ಕೊಡಗು ಮತ್ತು ದಕ್ಷಿಣ ಕನ್ನಡ ಗೌಡ ಸಮಾಜ ಬೆಂಗಳೂರು 

ತಳೂರು ತಂಡಕ್ಕೆ ಪೈಕೇರ ಕಪ್‌

ನಾಲ್ಕನೇ ಬಾರಿ ಪ್ರಶಸ್ತಿ ಗೆಲ್ಲುವ ಪರ್ಲಕೋಟಿ ತಂಡಕ್ಕೆ ನಿರಾಸೆ: 16 ರನ್‌ನಿಂದ ಸೋಲು

  ಪೈಕೇರ್‌ ಕ್ರಿಕೆಟ್‌ ಕಪ್‌ನ ಅಂತಿಮ ಹಣಾಹಣಿಯಲ್ಲಿ ತಳೂರು ತಂಡ ಚೊಚ್ಚಲ ಬಾರಿಗೆ ಪ್ರಶಸ್ತಿ ಮುಡಿಗೇರಿಸಿಕೊಂಡಿದೆ.

  ಕೊಡಗು ಗೌಡ ಯುವ ವೇದಿಕೆ ವತಿಯಿಂದ, ಪೈಕೇರ ಕುಟುಂಬಸ್ಥರ ಆಶ್ರಯದಲ್ಲಿ ನಗರದ ಜನರಲ್‌ ತಿಮ್ಮಯ್ಯ ಜಿಲ್ಲಾ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯಾವಳಿಯ ಫೈನಲ್‌ನಲ್ಲಿ ನಾಲ್ಕನೇ ಬಾರಿಗೆ ಪ್ರಶಸ್ತಿ ಗೆಲ್ಲುವ ಪರ್ಲಕೋಟಿ ತಂಡದ ಆಸೆಯನ್ನು ತಳೂರು ತಂಡ ಭಗ್ನಗೊಳಿ ಚಾಂಪಿಯನ್‌ ಎನಿಸಿಕೊಂಡಿತು.

  ಫೈನಲ್‌ ಪಂದ್ಯಕ್ಕೆ ದಾನಿಗಳಾದ ಕೋಚನ ಪ್ರವೀಣ್‌ ಚೆಂಡನ್ನು ಬಾರಿಸುವ ಮೂಲಕ ಚಾಲನೆ ನೀಡಿದರು. ಟಾಸ್‌ ಗೆದ್ದ ಪರ್ಲಕೋಟಿ ತಂಡ ಬೌಲಿಂಗ್‌ ಆಯ್ಕೆ ಮಾಡಿಕೊಂಡಿತು. ತಳೂರು ತಂಡದ ವಿಕ್ಕಿ ಹಾಗೂ ಜಿತು ಆರಂಭಿಕರಾಗಿ ಕಣಕ್ಕಿಳಿದರು. ಆದರೆ, ಮೊದಲ ಒವರ್‌ನಲ್ಲಿಯೇ ಜಿತು ಶೂನ್ಯಕ್ಕೆ ವಿಕೆಟ್‌ ಒಪ್ಪಿಸಿ ನಿರಾಸೆ ಮೂಡಿಸಿದರು. ಬಳಿಕ 4ನೇ ಓವರ್‌ವರೆಗೂ ರಕ್ಷಣಾತ್ಮಕ ಆಟಕ್ಕೆ ಮೊರೆ ಹೋದ ತಂಡ 5ನೇ ಓವರ್‌ನಲ್ಲಿ ಆಕ್ರಮಣ ಆಟಕ್ಕಿಳಿಯಿತು. ವಿಕ್ಕಿ ಬಿರುಸಿನ ಆಟ ಪ್ರದರ್ಶಿಸುವ ಮೂಲಕ ಪಂದ್ಯದ ಗತಿಯನ್ನೇ ಬದಲಿಸಿದರು. 5ನೇ ಓವರ್‌ನ ಮೊದಲ ಎಸೆತವನ್ನು ಬಾನಂಗಳದಲ್ಲಿ ತೇಲಿಸಿ ಸಿಕ್ಸ್‌ರ್‌ ಬಾರಿಸಿದ ವಿಕ್ಕಿ, ಎರಡನೇ ಎಸೆತದಲ್ಲಿ ಜೀವದಾನ ಪಡೆದು ಎರಡು ರನ್‌ ಗಳಿಸಿದರು. ನಂತರ ಸತತ ಮೂರು ಸಿಕ್ಸರ್‌ ಹಾಗೂ 1 ಬೌಂಡರಿ ಮೂಲಕ 30 ರನ್‌ ಕಲೆ ಹಾಕಿ ಉತ್ತಮ ರನ್‌ ಕಲೆ ಹಾಕುವಲ್ಲಿ ಯಶಸ್ವಿಯಾದರು. ಅಂತಿಮವಾಗಿ 17 ಬಾಲ್‌ನಲ್ಲಿ 42 ರನ್‌ ಚಚ್ಚಿ ಲಕ್ಷಿತ್‌ ಎಸೆತದಲ್ಲಿ ಕ್ಯಾಚ್‌ ನೀಡಿ ನಿರ್ಗಮಿಸಿದರು. ನಂತರ ಬಂದ ಬ್ಯಾಟ್ಸ್‌ಮನ್‌ಗಳು ಬಿರುಸಿನ ಆಟವಾಡಲು ವಿಫಲರಾದರು. ಆದರೆ ಮಧ್ಯಮ ಕ್ರಮಂಕದ ಬ್ಯಾಟ್ಸ್‌ಮನ್‌ ವಿಜು ತಾಳ್ಮೆ ಆಟವಾಡಿ ತಂಡದ ಮೊತ್ತ ಹೆಚ್ಚಿಸುವಲ್ಲಿ ಸಫಲರಾದರು. ಮನೋಜ್‌ 1, ಅಣ್ಣಯ್ಯ 2, ಪ್ರಸಾದ್‌ 1, ಪವನ್‌ 4, ಗಗನ್‌ 2 ರನ್‌ ಗಳಿಸಿದರು. ನಿಗದಿತ 10 ಓವರ್‌ಗೆ 7 ವಿಕೆಟ್‌ ನಷ್ಟಕ್ಕೆ 89 ರನ್‌ ಕಲೆಹಾಕಿತು.

  ಗೆಲುವಿಗಾಗಿ 90 ರನ್‌ಗಳ ಸವಾಲಿನ ಮೊತ್ತವನ್ನು ಬೆನ್ನತ್ತಿದ ಪರ್ಲಕೋಟಿ ತಂಡ 16 ರನ್‌ಗಳಿಂದ ಸೋಲೊಪ್ಪಿಕೊಂಡಿತು. ಸಜನ್‌ ಹಾಗೂ ದರ್ಶನ್‌ರ ಬಿರುಸಿನ ಬ್ಯಾಟಿಂಗ್‌ನಿಂದ ಉತ್ತಮ ಆರಂಭ ಪಡೆಯಿತಾದರೂ (ಸಜನ್‌ 17, ದರ್ಶನ್‌ 11) ಗೆಲ್ಲುವ ಕನಸು ನನಸಾಗಲಿಲ್ಲ. ಸನತ್‌ 14 ಗಳಿಸಿ ಔಟಾದರೆ, ಬಳಿಕ ಬಂದ ಬ್ಯಾಟ್ಸ್‌ಮನ್‌ಗಳು ಎರಡಂಕಿಯನ್ನೂ ದಾಟಲಿಲ್ಲ. ಸತ್ಯ 8, ರಜಿತ್‌ 1, ದಿಜಿತ್‌ 7, ಕೀರ್ತನ್‌ 0, ದಯಾ 6 ರನ್‌ಗಳಿಸಿದರು. ಅಂತಿಮವಾಗಿ ಪರ್ಲಕೋಟಿ ತಂಡ 16 ರನ್‌ಗಳಿಂದ ಪರಾಭವಗೊಂಡಿತು.

ಕುಣಿದು ಕುಪ್ಪಳಿಸಿದರು...

  ಫೈನಲ್‌ ಪಂದ್ಯಾವಳಿಗೆಂದು ಕಾರ್ಯಕ್ರಮ ಆಯೋಜಕರು ವಿಶೇಷ ಬ್ಯಾಂಡ್‌ ವ್ಯವಸ್ಥೆ ಮಾಡಿದ್ದರು. ಬ್ಯಾಟ್ಸ್‌ಮನ್‌ಗಳು ಬೌಂಡರಿ, ಸಿಕ್ಸರ್‌ ಬಾರಿಸುತ್ತಿದ್ದಂತೆ ಬ್ಯಾಂಡ್‌ ಬಾರಿಸಿ ಕ್ರೀಡಾಭಿಮಾನಿಗಳ ಹರುಷವನ್ನು ದುಪ್ಪಟ್ಟು ಮಾಡುತ್ತಿದ್ದರು. ತಳೂರು ತಂಡ ಜಯ ಸಾಧಿಸಿದೊಡನೆ ತಂಡದ ಕುಟುಂಬಸ್ಥರು ಹಾಗೂ ಆಟಗಾರರು ಮೈದಾನ ಪ್ರವೇಶಿಸಿ ಕುಣಿದಾಡಿದರು. ಮಹಿಳೆಯರು ಮಕ್ಕಳು ಸೇರಿದಂತೆ ಕುಟುಂಬ ವರ್ಗದವರೆಲ್ಲ ಹೆಜ್ಜೆ ಹಾಕಿ ಸಂಭ್ರಮಿಸಿದರು.

ಮೂರನೇ ಸ್ಥಾನ-ದಂಬೆಕೋಡಿ ಹಾಗೂ ಊಳುವಾರನ

ಪಂದ್ಯಶ್ರೇಷ್ಠ-ಪರ್ಲಕೋಟಿ ಸಜನ್‌

ಉತ್ತಮ ಬೌಲರ್‌-ಊಳುವಾರನ ಮೋಕ್ಷಿತ್‌

ಉತ್ತಮ ಬ್ಯಾಟ್ಸ್‌ಮನ್‌ -ತಳೂರು ವಿಕ್ಕಿ

ಉತ್ತಮ ಆಲ್‌ ರೌಂಡರ್‌-ತಳೂರು ಜೀತು

ಪಂದ್ಯಾವಳಿಯಲ್ಲಿ ಹೆಚ್ಚು ಸಿಕ್ಸರ್‌ ಗಳಿಸಿದವರು-ಪೈಕೇರ ಗಗನ್‌

ಫೈರ್‌ ಪ್ಲೇ ಟೀಮ್‌-ದಂಬೆಕೋಡಿ

ಕಬ್ಬಡಿ (ಪುರುಷರು) -ಕೊಳಂಬೆ (ಪ್ರ)

ಪೀಚೆಮನೆ (ದ್ವಿ)

ಕಬ್ಬಡಿ ಮಹಿಳೆಯರು-ಹೊಸೋಕ್ಲು (ಪ್ರ)

ಕೂರ್ಗ್‌ ಕ್ವಿನ್ಸ್‌ (ದ್ವಿ)

ಥ್ರೋ ಬಾಲ್‌ (ಮಹಿಳೆಯರು)

ಕಟ್ಟೆಮನೆ (ಪ್ರ)

ಬೈನೆರವನ(ದ್ವಿ)

ಗಮನ ಸೆಳೆದ ಸಾಂಸ್ಕೃತಿಕ ಕಾರ್ಯಕ್ರಮ

  ಸಾಂಸ್ಕೃತಿಕ ಕಾರ್ಯಕ್ರಮವನ್ನು ಕರ್ನಾಟಕ ಅರೆಭಾಷೆ ಸಂಸ್ಕೃತಿ ಮತ್ತು ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ಕೊಲ್ಯದ ಗಿರೀಶ್‌ ಉದ್ಘಾಟಿಸಿದರು. ಅರೆಭಾಷೆ ಸಾಹಿತ್ಯ ಅಕಾಡೆಮಿ ವತಿಯಿಂದ ನಡೆದ ನಾನಾ ಸಾಂಸ್ಕೃತಿಕ ಕಾರ್ಯಕ್ರಮಗಳು ನೋಡುಗರ ಮನ ಸೆಳೆಯಿತು. ಚೊಕ್ಕಾಡಿ ಪ್ರೇಮ ಮತ್ತು ತಂಡದಿಂದ ನಡೆದ ಸಾಂಸ್ಕೃತಿಕ ನೃತ್ಯ, ಕೂಡಕಂಡಿ ತರುಣ್‌ ಹಾಗೂ ತಂಡದಿಂದ ನಡೆದ ಸಾಂಸ್ಕೃತಿಕ ಉಡುಪು ಪ್ರದರ್ಶನ, ಕೊಡಗು ಗೌಡ ಯುವ ವೇದಿಕೆ ವತಿಯಿಂದ ನಡೆದ ಬೆಳಕಾಟ್‌, ಕುಕ್ಕೆರ ಲಕ್ಷ ್ಮಣ ಮಾರ್ಗದರ್ಶನದಲ್ಲಿ ಮೂಡಿಬಂದ ವೀರ ಚರಿತ್ರೆ, ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಪ್ರಾಯೋಜಕತ್ವದಲ್ಲಿ ಹಾಸ್ಯ ಕಲಾವಿದ ರಾಘವೇಂದ್ರ ಮತ್ತು ತಂಡದಿಂದ ಹಾಸ್ಯ ಲಹರಿ ಹಾಗೂ ರಸಮಂಜರಿ ಕಾರ್ಯಕ್ರಮ ಪ್ರೇಕ್ಷ ಕರಿಂದ ಚಪ್ಪಾಳೆ ಗಿಟ್ಟಿಸುವಲ್ಲಿ ಯಶಸ್ವಿಯಾಯಿತು. ರಾಯಲ್‌ ಬ್ರದರ್ಸ್‌ ಸಂಸ್ಥೆಯ ಪ್ರಾಯೋಜಕತ್ವದಲ್ಲಿಮೈಸೂರಿನ ಸಾವನ್‌ ತಂಡದಿಂದ ರಾಕ್‌ ಮ್ಯೂಸಿಕ್‌ ಕಾರ್ಯಕ್ರಮ ಪ್ರೇಕ್ಷ ಕರಿಂದ ಚಪ್ಪಾಳೆ ಗಿಟ್ಟಿಸಿತು.

ಸನ್ಮಾನ

  ಕಾರ್ಯಕ್ರಮದಲ್ಲಿ ಶಿಕ್ಷ ಣ ಇಲಾಖೆಯ ನಿವೃತ್ತ ಜಂಟಿ ನಿರ್ದೇಶಕ ಕೊಂಪುಳಿರ ಆನಂದ್‌, ಶಿಕ್ಷ ಣ ಕ್ಷೇತ್ರದ ಸಾಧನೆಗಾಗಿ ದೇವಜನ ಮೋಹನ್‌, ಸಾಹಿತ್ಯ ಕ್ಷೇತ್ರದಲ್ಲಿ ಕಟ್ರತನ ಬೆಳ್ಯಪ್ಪ ಮತ್ತು ಪಟ್ಟಡ ಪ್ರಭಾಕರ್‌, ಕ್ರೀಡಾಕ್ಷೇತ್ರದಲ್ಲಿ ಚೆರಿಯಮನೆ ಮೇಘ ಪ್ರಭಾಕರ್‌, ಕುಯ್ಮುಡಿ ಹನಿ, ಚೋಂಡಿರ ತವನ್‌, ಮೇರ್ಕಜೆ ಗಿರೀಶ್‌, ರಾಜ್ಯ ಮಟ್ಟದ ಕರಾಟೆ ಪಟು ಬೈಲೇರ ಪ್ರೊನಿಕ್ಷ , ಸಹಕಾರಿ ಕ್ಷೇತ್ರ ಕಾಂಗೀರ ಸತೀಶ್‌, ಲಾಂಛನ ವಿನ್ಯಾಸ ಪುದಿಯನೆರವನ ರಿಶಿತ್‌ ಮಾದಯ್ಯ ಹಾಗೂ ಕರ್ಣಯ್ಯನ ಅನೂಪ್‌ ಕಾರ್ಯಪ್ಪರವರನ್ನು ಸನ್ಮಾನಿಸಲಾಯಿತು.

ಐನ್‌ಮನೆ ವೇದಿಕೆ

  ಪೈಕೇರ ಕಪ್‌ನ ಸಭಾ ಕಾರ್ಯಕ್ರಮದ ಅಂಗವಾಗಿ ವೇದಿಕೆಯಲ್ಲಿ ಪೈಕೇರ ಕುಟುಂಬಸ್ಥರ ಐನ್‌ಮನೆ ರೀತಿಯ ವೇದಿಕೆ ಸಿದ್ಧಪಡಿಸಿದ್ದು ವಿಶೇಷವಾಗಿತ್ತು. ಆಧುನಿಕ ಯುಗದಲ್ಲಿ ಐನ್‌ಮನೆ ಎಂಬ ಪರಿಕಲ್ಪನೆ ದೂರವಾಗುತ್ತಿದ್ದು, ಮೂಲೆ ಗುಂಪಾಗಿರುವ ಐನ್‌ಮನೆಯನ್ನು ಉಳಿಸಿ ಬೆಳೆಸುವ ಉದ್ದೇಶದಿಂದ ಐನ್‌ ಮನೆ ರೀತಿಯ ವೇದಿಕೆಯನ್ನು ಸಿದ್ಧಪಡಿಸಲಾಗಿದ್ದು ಕ್ರೀಡಾಭಿಮಾನಿಗಳ ಮನಸೂರೆಗೊಂಡಿತು.

Reply to the Poomale news article

 'ಪೂಮಾಲೆ' ಎಂಬ ಪತ್ರಿಕೆಯಲ್ಲಿ ಗೌಡ ಜನಾಂಗದ ಆಚಾರ ವಿಚಾರಗಳ ಬಗ್ಗೆ ಅಪಹಾಸ್ಯ ಮಾಡಿ ಬರೆದ ಸಂಪಾದಕೀಯ ವರದಿಗೆ ಸ್ಪಷ್ಟೀಕರಣ:

ಮಾನ್ಯರೆ,

ಕಾವೇರಿ ಸಂಕ್ರಮಣ ಜಾತ್ರೆಗೆ ಸಂಬಂಧಿಸಿದಂತೆ ವರ್ಷಂಪ್ರತಿ ನಡೆಸಿಕೊಂಡು ಬರುತ್ತಿರುವ ಆಚರಣೆ, ಕಟ್ಟು ಬೀಳುವುದು (ಗೊನೆಕಡಿಯುವುದು) ಸೇರಿದಂತೆ ಪತ್ತಾಯಕ್ಕೆ ಅಕ್ಕಿ ಹಾಕುವುದು, ಭಂಡಾರ ತೆಗೆದುಕೊಂಡು ಹೋಗುವುದು ಒಂದು ಪದ್ದತಿ, ಆಚರಣೆ. ಜಾತ್ರೆಗಿಂತ ತಿಂಗಳ ಹಿಂದೆ ನಡೆಯುವ ಕಟ್ಟುಪಾಡುಗಳನ್ನು ಅಲ್ಲದೆ ತುಲಾಮಾಸದ ಒಂದು ತಿಂಗಳೂ ಅಭರಣ ಹಾಗು ಕ್ಷೇತ್ರದ ರಕ್ಷಣಾ ಕಾರ್ಯಕ್ಕೆ ವ್ರತದಾರಿಗಳಾಗಿ ಕೋಡಿ ಮತ್ತು ಬಳ್ಳಡ್ಕ ಮನೆತನದವರು ದೇವಾಲಯದಲ್ಲಿ ಶಸ್ತ್ರ ದಾರಿಗಳಾಗಿ ನೆಲೆಯೂರುವುದು ಅತ್ಯಂತ ಪುರಾತನ ಸಂಪ್ರದಾಯಗಳು ಹಾಗು ಅವರ ಜವಾಬ್ದಾರಿ (ಇದಕ್ಕಾಗಿಯೇ ಹಾಲೇರಿ ರಾಜರು ಕೊಡಲ್ಪಟ್ಟ  ಆಯುಧಗಳನ್ನು ಕೋಡಿ ಮನೆತನದವರು ಭಂಡಾರ ಮೆರವಣಿಗೆಯಲ್ಲಿ ಹಿಡಿಯುವುದು).

ಕೊಡಗಿನಾದ್ಯಂತ ಪ್ರಚಲಿತವಿರುವ ತಕ್ಕ ಮುಖ್ಯಸ್ಥರ ದೇವ,ದೈವ ಕಾರ್ಯಗಳ ನಿರ್ವಹಣೆ, ಸುತ್ತಮುತ್ತಲಿನ ನಾಲ್ಕು ಗ್ರಾಮದವರ ಸಹಕಾರದೊಂದಿಗೆ ಊರ ಹಬ್ಬಗಳನ್ನು ಮಾಡುವುದು ಬಹಳ ಹಿಂದಿನಿಂದಲೂ ನಡೆದುಕೊಂಡು ಬಂದಿರುವ ಪದ್ದತಿ. ಇದಕ್ಕಾಗಿ ಆಯಾ ಪ್ರದೇಶದಲ್ಲಿ ನೆಲೆಸಿರುವ ಪ್ರತಿಷ್ಠಿತ ಕುಟುಂಬಗಳನ್ನೆ ದೇವ ತಕ್ಕ, ಭಂಡಾರ ತಕ್ಕ, ಕಾವಲುಗಾರ ಹೀಗೆ ಕೊಡಗಿನ ಎಲ್ಲಾ ದೇವಾಲಯಗಳಲ್ಲಿ  ನೇಮಕವಾಗಿರುವುದು ಎಲ್ಲರಿಗೂ ತಿಳಿದ ವಿಷಯವೇ. ಈ ಪದ್ಧತಿಗಳು, ಕಟ್ಟುಪಾಡುಗಳು, ಹಾಲೇರಿ ರಾಜರ ಆಳ್ವಿಕೆಯಲ್ಲಿ  ಆದೇಶಗಳಾಗಿ, ಮುಂದೆ ಕೊಡಗಿನ ಹಲವು ದೇವಾಲಯಗಳಲ್ಲಿ ಕೊಡವ ಜನಾಂಗದವರೂ ತಕ್ಕ ಮುಖ್ಯಸ್ಥರಾಗಿ ಸೇವೆ ಸಲ್ಲಿಸುತ್ತಿರುವುದು ಎಲ್ಲರಿಗೂ ತಿಳಿದ ವಿಷಯವೆ.

ಇದರ ಪ್ರಕಾರ ಹಿಂದಿನಿಂದಲೂ ನಡೆದುಕೊಂಡು ಬಂದ ಆಭರಣ ಮತ್ತು ಭಂಡಾರ ತೆಗೆದುಕೊಂಡು ಹೋಗುವ ಸಂಧರ್ಭದಲ್ಲಿ, ಕೇವಲ ತಕ್ಕ ಮುಖ್ಯಸ್ಥರಾದಿಯಾಗಿ(ಬಲ್ಲಡ್ಕ ಹಾಗು ಕೋಡಿ ಮನೆ) ಬೆರಳೆಣಿಕೆಯಷ್ಟು ಕುಟುಂಬ ಹಾಗು ಊರವರು ಭಾಗವಹಿಸುತಿದ್ದರು. ಇದನ್ನು ಕಂಡ ಭಕ್ತರು, ಒಂದು ದೊಡ್ಡ ಉತ್ಸವವಾಗಿ, ಕಾವೇರಿ ಮಾತೆಯ ಸನ್ನಿದಿಯ ಸಂಪ್ರದಾಯವನ್ನು ಜಗಜ್ಜಾಹಿರಾತು ಮಾಡುವ ಉದ್ದೇಶದಿಂದ, ಹಲವು ವರ್ಷಗಳಿಂದ, ಭಾಗಮಂಡಲ ನಾಡಿನ ಗೌಡ ಜನಾಂಗದವರು, ಗೌಡ ಸಮಾಜಗಳ ಸಹಕಾರದೊಡನೆ ಆಭರಣ ಮತ್ತು ಭಂಡಾರ ತೆಗೆದುಕೊಂಡು ಹೋಗುತ್ತಿರುವುದು, ಕಾವೇರಿ ಮಾತೆಯ ಕೃಪೆಗೆ ಪಾತ್ರರಾಗಲು ಮಾಡುವ ಕಿರುಸೇವೆ ಅಷ್ಟೆ. 

ಆದರೆ ಈ ವಿಷಯವನ್ನಿಟ್ಟುಕೊಂಡು, ಪೂಮಾಲೆ ಎಂಬ ಕೊಡವ ಬಾಷೆಯ ಪತ್ರಿಕೆಯೊಂದರ ಸಂಪಾದಕ- ಅಜ್ಜನಿಕಂಡ ಸಿ. ಮಹೇಶ್ ನಾಚಯ್ಯನವರು, ಅವರ ಜನಾಂಗದ ಮೇಲೆ ಗೌಡ ಜನಾಂಗದವರು ಸವಾರಿ ಮಾಡುತ್ತಿದ್ದಾರೆ ಎಂಬ ರೀತಿಯ ಹೇಳಿಕೆಯು ಹಾಗು ಇನ್ನಿತರ ಕೀಳು ಭಾಷೆಯಲ್ಲಿ ವರ್ಣನೆ  ಹಾಸ್ಯಾಸ್ಪದ. ಇವರು ತಿಳಿದಂತೆ ಆಚರಣೆಗಳು ಇಂದು ನಿನ್ನೆಯದಲ್ಲ. ಅಲ್ಲದೆ, ಯಾವುದೇ ಜನಾಂಗದ ಮೇಲೆ ಸವಾರಿ ಮಾಡುವ ಉದ್ದೇಶ ಸದ್ಯಕ್ಕೆ ಯಾರೂ ಹೊಂದಿಲ್ಲ ಹಾಗು ಅದರ ಅಗತ್ಯತೆಯೂ ಇಲ್ಲ. ಅವರೇ ಹೇಳಿದಂತೆ, ಕಾವೇರಿ ಮಾತೆ ಕೇವಲ ಗೌಡ ಅಥವಾ ಕೊಡವ ಜನಾಂಗದ ಸ್ವತ್ತಲ್ಲ. ಸಮಸ್ತ ನಾಡಿನ, ರಾಜ್ಯ, ಅಂತರರಾಜ್ಯ ಜನರ ಜೀವನಾಡಿಯಾಗಿ, ಕುಲದೇವಿಯಾಗಿ ಆರಾಧಿಸಲ್ಪಡುತ್ತಿದ್ದಾಳೆ. ಹೊರ ರಾಜ್ಯದ ಭಕ್ತರು ಕೂಡ ಹಲವು ದಶಕಗಳಿಂದ ಅನೇಕ ಸೇವಾ ಕಾರ್ಯಗಳನ್ನು ನೆರವೇರಿಸುತ್ತಿದ್ದಾರೆ.

ಸಂಪ್ರದಾಯ, ಪದ್ದತಿಗಳು, ಮಹೇಶ್ ನೊಡಿದ ಒಂದು ದಿನದ ಆಚರಣೆಯಲ್ಲ. ಮುಂದಿನ ವರ್ಷ ಖುದ್ದಾಗಿ ಬಂದು ನೋಡಿ ತಿಳಿದು ಮಾತಾಡಲಿ. ಅದೇ ರೀತಿ, ಕಾವೇರಿ ತೀರ್ಥ ಬರುವ ದಿನ ಕೆಲವು ಕೊಡವ ಭಕ್ತರು ದುಡಿಹಾಡು, ಆರತಿ ಬೇಳಗುವ ಇತ್ತೀಚೆಗಿನ ಕಳೆದೆರೆಡು ವರ್ಷಗಳ ಹೊಸ ಸಂಪ್ರದಾಯವನ್ನು ನೀವು ನೊಡಿಲ್ಲವೆ? ಗೌಡ ಜನಾಂಗ ಇದುವರೆಗೆ ಇದನ್ನು ಟೀಕಿಸಿದೆಯೆ?

ಅಜ್ಜನಿಕಂಡ ಸಿ ಮಹೇಶ್ ನಾಚಯ್ಯನವರೆ, ನಿಮ್ಮಲ್ಲಿ ಒಂದು ವಿನಂತಿ. ಬಹುಸಂಖ್ಯಾತರಾಗಿರುವ ಗೌಡ ಹಾಗು  ಕೊಡವ ಜನಾಂಗದ ನಡುವೆ ಅಣ್ಣ ತಮ್ಮಂದಿರು ಎಂಬ ಭಾವನೆ ಇದೆ. ಕೆಲವು ವಿಷಯಗಳಲ್ಲಿ ವೈಷಮ್ಯವಾಗಿದ್ದರು, ಅದು ಅಣ್ಣ ತಮ್ಮಂದಿರ ಜಗಳ ಮಾತ್ರ. ಇದನ್ನೇ ನೀವು ಶಕುನಿ ರೀತಿ ಜನಾಂಗಗಳ ಮದ್ಯೆ ಒಡಕು ತರದಿರಿ. ಇಂದು ಎಲ್ಲಾ ಜನಾಂಗದಲ್ಲಿ ಇರುವಂತೆ , ಒಂದು ಒಳ್ಳೆಯ ಸಂಸ್ಕೃತಿ ಇರುವವರ ಮದ್ಯೆ ಕೆಲವು ಕುನ್ನಿ ಮತ್ತು ಉಗ್ರಗಾಮಿ ವ್ಯಕ್ತಿತ್ವದವರ ಕುತಂತ್ರ ರೀತಿ ತಮ್ಮ ಹೇಳಿಕೆ ಆಗುವುದು ಬೇಡ. ನಿಮ್ಮ ಹೇಳಿಕೆಗಳು, ಒಬ್ಬ ಜವಾಬ್ದಾರಿಯುತ ಪತ್ರಿಕೆಯ ಸಂಪಾದಕರಿಂದೆನಿಸಿಕೊಳ್ಳಲು ತರವಲ್ಲ. ಅದನ್ನು ಬಿಟ್ಟು ಎಲ್ಲಾ ಜನರ ಒಗ್ಗಟ್ಟಿಗೆ, ದೇಶದ ಸಮೃದ್ಧಿಗೆ ಜೊತೆಗೊಂಡು ಮುಂದುವರೆಯೋಣ.

ವಂದನೆಗಳೋಂದಿಗೆ,

 

_ಭಾಗಮಂಡಲ ನಾಡಿನ ಜನತೆ ಪರವಾಗಿ, ಕೋಡಿ, ಬಳ್ಳಡ್ಕ, ಕುಯ್ಯಮುಡಿ ಮನೆತನದವರು, ಕೊಡಗಿನಾದ್ಯಂತ ಯುವ ಸಂಘಟನೆ ಹಾಗು ವೇದಿಕೆಗಳು, ಹಿತೈಷಿಗಳು, ಭಕ್ತರು, ಎಲ್ಲೆಡೆ ಪಸರಿಸಿರುವ ಅರೆಭಾಷಿಕ ಗೌಡ ಬಂದುಗಳು._

ಸಾಮೂಹಿಕ ಸತ್ಯನಾರಾಯಣ ಪೂಜೆ - ಕೊಡಗು ದಕ್ಷಿಣ ಕನ್ನಡ ಗೌಡ ಸಮಾಜ. ಯುಏಇ. Friday, 12 October 2018 from 08:30-15:30

ಆತ್ಮೀಯ ಭಕ್ತ ಮಹಾಶಯರಿಗೆ ಆಧರಣೀಯ ಅಕ್ಕರೆಯ ಕರೆಯೋಲೆ
ಸ್ವಸ್ತಿ  ಶ್ರೀ ವಿಲಂಬಿ ನಾಮ ಸಂವತ್ಸರದ ಭಾದ್ರಪದ ಅಮಾವಾಸ್ಯೆ ಮೊದಲ್ಗೊಂಡು ಅಶ್ವಯುಜ ಶರದ್ ಋತುವಿನ ಶುಕ್ಲ ಪಕ್ಷ 4 ರ ಮಹಾನವಮಿ

ದಿನಾಂಕ  12 ಅಕ್ಟೋಬರ 2018 ಶುಕ್ರವಾರ 

ಸಮಯ: ಬೆಳಿಗ್ಗೆ  08:30 ರಿಂದ ಮಧ್ಯಾಹ್ನ 02:00 ರ ವರೆಗೆ 

ಬರ್ ದುಬೈ ನ ಸಿಂಧಿ ಸಭಾಂಗಣ ದಲ್ಲಿ 

ಸಮಸ್ತ ಹತ್ತು ಕುಟುಂಬ ಹದಿನೆಂಟು ಗೋತ್ರದ ಗೌಡ ಬಾಂಧವರ  ವತಿಯಿಂದ;  

ಕೊಡಗು ಸಂತ್ರಸ್ತರ ಪುನರ್ವಸತಿ ಕಲ್ಪಿಸುವ ಪರಿಹಾರ ಸಹಾಯಾರ್ಥ

ಪುರೋಹಿತರಾದ ಶ್ರೀಯುತ ರಘು ಭಟ್ ಅವರ ಪೌರೋಹಿತ್ಯದಲ್ಲಿ 

ಸಾಮೂಹಿಕ  ಶ್ರೀ ಸತ್ಯನಾರಾಯಣ ಪೂಜೆ
ಹಾಗೂ ಚಿಣ್ಣರ ಬಳಗ - ಕೊಡಗು ದಕ್ಷಿಣ ಕನ್ನಡ ಗೌಡ ಸಮಾಜ. ಯು.ಏ.ಇ. ವತಿಯಿಂದ ಭಜನಾ ಕಾರ್ಯಕ್ರಮ ನಡೆಸುವುದೆಂದು ನಿರ್ಧರಿಸಿರುತ್ತೇವೆ.

ಮಹಾ ಮಂಗಳಾರತಿ ನಂತರ ಮಹಾಪ್ರಸಾದ ವಿತರಣೆಯಾಗಲಿದೆ.

ಈ ಪ್ರಯುಕ್ತ ಸಾಮಾಜಿಕ ಜಾಲತಾಣವಾದ ಫೇಸ್ಬುಕ್ ಪುಟದಲ್ಲಿ ಕಾರ್ಯಕ್ರಮದ ಪ್ರಚಾರ ಕೊಂಡಿಯನ್ನು ಹರಿಯಬಿಡಲಾಗಿದೆ. ಪೂಜಾ ಕಾರ್ಯಕ್ರಮದಲ್ಲಿ ಭಾಗವಹಿಸಲಿಚ್ಚಿಸುವ ಪ್ರತಿಯೊಬ್ಬರೂ ದಯವಿಟ್ಟು ಈ ಜಾಲತಾಣದ ಕೊಂಡಿಯಲ್ಲಿ ತಮ್ಮ ಹಾಜರಾತಿಯನ್ನು ಖಾತ್ರಿ ಗೊಳಿಸಿ ಆಡಳಿತ ಮಂಡಳಿಯ ಜೊತೆಗೆ ಸಹಕರಿಸಬೇಕು ಎಂದು ಮನವಿ. 

ಸರ್ವರಿಗೂ ಹಾರ್ದಿಕ ಸುಸ್ವಾಗತ